ᑲᑎᒪᔩᑦ


NRC board of directors

ᐱᒋᐊᕐᓗᑎᒃ ᓴᐅᒥᐊᓂᒃ ᑕᓕᖅᐱᐊᓄᑦ: ᑕᐃᕙᑦ ᐃᓕᐊᑦ, ᓯᑳᑦ ᑐᐊᑎ, ᓵᓕ ᐃᕚᓕᒃ, ᕌᓐ ᐅᐊᓚᔅ, ᔮᓐ ᑖᓂᕼᐃ

ᓵᓕ ᐃᕚᓕᒃ, ᐃᒃᓯᕙᐅᑕᖅ

ᓵᓕ ᐃᕚᓕᒃ ᐱᔪᖅ ᐃᖃᓗᒃᑑᑦᑎᐊᒥᒃ, ᓄᓇᕗᑦᒥᒃ, ᐊᒻᒪᓗ ᓯᕗᓕᖅᑎᐅᓯᒪᓕᖅᑐᖅ ᕿᑎᕐᒥᐅᓂ ᐊᕐᕌᒍᐃᑦ ᐅᓄᖅᑐᑦ. ᑖᓐᓇ ᒫᓐᓇ ᐊᖓᔪᖄᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ; ᓂᕈᐊᖅᑕᐅᖃᑦᑕᖅᓯᒪᓕᖅᑐᖅ ᑕᒡᕗᖓᑦᓴᐃᓐᓇᖅ ᐃᓂᖓᓄᑦ ᐱᙵᓱᐊᖅᑎᖅᓱᓂ. ᑕᒡᕙᓂ ᐊᑑᑎᑎᓪᓗᒍ ᐃᓂᒥᓂ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖄᖑᑎᓪᓗᒍ, ᑐᒃᓯᕋᐅᑎᓂᒃ ᐱᖁᔭᖅᑎᒍᑦ ᐋᔩᕈᑎᓂᒃ ᐊᑑᑎᑦᓯᓯᐊᖃᑦᑕᖅᓯᒪᖕᒪᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐊᖏᕈᑎᒃᑯᑦ ᐱᔾᔪᑎᓕᖕᓂᒃ ᐊᖏᓈᖅᓯᒪᔪᓂᒃ ᐱᕙᓪᓕᐊᑎᑦᓯᔾᔪᑎᓂᒃ. ᐊᖓᔪᖄᖑᓪᓗᓂ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᓵᓕ ᐃᕚᓕᒃ ᑎᓕᓯᖃᑦᑕᖅᓯᒪᖕᒥᔪᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦᑎᒍᑦ ᓴᖀᖁᔨᓪᓗᓂ ᓇᓗᓇᐃᖅᓯᒍᑎᒃᓴᒥᒃ ᐊᖏᕈᑎᑎᒍᑦ ᓴᓇᔨᒃᑯᓐᓄᑦ ᑕᓕᕆᔭᐅᒻᒪᑕ ᐅᓇᑕᖅᑐᒃᓴᓕᕆᔨᒃᑯᓐᓄᑦ, ᑕᒪᒃᑯᓄᖓᖓᔪᑦ ᓴᕿᓚᕿᓯᒪᖕᒪᑕ ᐊᑑᑎᓂᖃᓪᓚᕆᒃᑐᑦ ᐊᑐᐃᓐᓇᕈᖅᓯᒪᓕᕐᒪᑕ ᐃᓄᖕᓄᑦ ᓄᓇᑖᖃᑕᐅᓯᒪᔪᓄᑦ ᐱᓕᕆᕕᖁᑎᓕᖕᓄᑦ ᐊᑑᑕᐅᓕᕋᐃᒻᒪᑕ ᐊᕙᑎᓕᕆᔾᔪᑎᑦ ᓄᓇᐃᑦ ᓴᓗᒻᒪᓴᖅᑕᐅᖃᑦᑕᖅᑎᓪᓗᒋᑦ ᑑᓚᐃᕕᓃᑦ. ᑖᓐᓇ ᓵᓕ ᐃᕚᓕᒃ ᓯᕗᓪᓕᖅᐸᓚᐅᖅᓯᒪᔪᖅ ᐃᓅᓪᓗᓂ ᑲᑎᒪᔨᐅᓪᓗᓂ ᐅᖅᓱᐊᓗᓕᕆᔨᖅᔪᐊᑯᓐᓄᑦ ᐹᓐ ᐋᖅᑎᒃᑯᓐᓄᑦ ᓯᕗᓪᓕᖅᐸᐅᖃᑕᐅᔪᓄᑦ ᖁᑦᓯᖕᓂᓕᖕᓄᑦ ᓄᑖᖑᑎᓪᓗᒋᑦ ᕿᓂᖅᑏᑦ ᐅᖅᓱᐊᓗᖕᓂᒃ ᐊᒻᒪᓗ ᒐᓴᓖᒥᒃ ᒪᑐᒪ ᓄᓇᖓᓂ Sverdrup Basin ᑲᓇᑕᐅᑉ ᐅᑭᐅᖅᑕᖅᑐᖓᑕ ᓄᓇᖓᓂ. ᐱᓕᕆᐊᖃᖃᑦᑕᖅᓯᒪᖕᒥᔪᖅ ᐱᑐᐃᓐᓇᐅᖏᑦᑐᒥᒃ ᖁᑦᓯᖕᓂᓕᖕᓂᒃ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ ᐊᒻᒪᓗ ᐃᓚᐅᓪᓚᕆᖃᑦᑕᖅᓯᒪᓪᓗᓂ ᐋᔩᕈᑎᒃᑯᑦ ᐱᒋᐊᕐᖓᐅᑎᓂᒃ ᓴᕿᖅᑕᐅᕙᓪᓕᐊᑎᓪᓗᒍ ᓄᓇᕗᑦ.

ᑕᐃᕙᑦ ᐃᓕᐊᑦ, ᑐᓪᓕᐊ ᐃᒃᓯᕙᐅᑕᐅᑉ ᐊᒻᒪᓗ ᑲᑎᒪᔨᐅᓪᓗᓂ

ᑕᐃᕙᑦ ᐃᓕᐊᑦ ᑐᓪᓕᐊ ᐃᒃᓯᕙᐅᑕᐅᑉ ᐊᒻᒪᓗ ᑐᑭᒧᐊᒃᑎᑦᓯᔨᐅᓪᓗᓂ ᐅᑯᓄᖓ Haywood Securities-ᑯᓐᓄᑦ. ᐊᐅᓚᑦᓯᔨ Haywood Securities-ᑯᓐᓄᑦ, ᑕᐃᕙᑦ ᐃᓕᐊᑦ ᐃᑲᔪᖃᑦᑕᖅᑐᖅ ᑲᑎᒪᔨᐅᓪᓗᓂ ᐅᖓᑕᓅᖓᔪᓂᒃ $6 ᐱᓕᐊᓐᑖᓚᓅᖓᔪᑦ ᑮᓇᐅᔭᖃᕈᑎᓂᒃ, ᑲᒪᖃᑦᑕᖅᓱᓂ ᐋᕿᒃᓯᒪᔾᔪᑎᖏᓐᓂᒃ ᐱᕈᑉᐸᓪᓕᐊᑎᑦᓯᒍᑎᓂᒃ ᐅᔭᕋᓐᓂᐊᖅᑐᓕᕆᓂᕐᒨᖓᔪᓂᒃ ᐊᒻᒪᓗ ᐅᖅᓱᐊᓗᓕᕆᔾᔪᑎᓂᒃ. ᐱᓕᕆᐊᖃᓲᖅ ᐊᐅᓚᑦᓯᒍᑕᐅᓲᓂᒃ ᑲᑐᔾᔭᐅᓪᓗᑎᒃ ᐱᓕᕆᕕᖕᓂ Vancouver-ᒥ ᑎᑎᕋᖅᕕᖕᒥ ᐱᓕᕆᐊᖃᑉᐸᖕᒥᔪᖅ ᑕᐅᖅᓰᒍᑎᓅᖓᔪᓂᒃ ᐊᐅᓚᑦᓯᒍᑎᓂᒃ. ᑕᐃᕙᑦ ᐃᓕᐊᑦ ᐱᓕᕆᐊᒥᓂᒃ ᐱᓕᕆᐊᖃᖃᑦᑕᓕᓚᐅᖅᓯᒪᔪᖅ ᐅᕙᓂ 1968-ᒥ ᐊᑐᐃᓐᓇᕐᓂᒃ ᑕᐅᖅᓰᒍᑎᓕᕆᔨᐅᓪᓗᓂ ᒪᓐᑐᕆᐊᒥ, Vancouver-ᒨᓚᐅᕋᓂ 1970-ᒥ. ᑕᐃᕙᑦ ᐃᓕᐊᑦ ᐊᒃᓱᐊᓗᒃ ᐅᔾᔨᑐᑦᓯᐊᒃᑲᖅ ᓇᓗᓇᐃᔭᖅᓯᒪᑦᓯᐊᕆᐊᓕᖕᓂᒃ ᓈᒻᒪᓈᖅᓯᒪᑦᓯᐊᕐᓗᑎᒃ ᐱᕈᑉᐸᓪᓕᐊᑎᑦᓯᔾᔪᑎᓅᖓᔪᓂᒃ ᐱᖁᑎᖃᕈᑎᓅᖓᔪᓂᒃ ᐊᒻᒪᓗ ᐊᓯᖏᓐᓂᒃ ᑲᔪᓯᑎᑦᓯᖃᑦᑕᖅᓯᒪᔪᖅ ᐊᒥᓱᐊᓗᖕᓂᒃ ᓄᑖᓂᒃ ᐅᔭᕋᒃᓴᖅᓯᐅᖅᑎᓂᒃ ᕿᓂᖅᑏᑦ ᑲᒻᐸᓃᑦ ᐱᒋᐊᕐᖓᓕᕋᐃᒻᒪᑕ ᐱᓕᕆᕕᖕᒥᓐᓂ.

ᓯᑳᑦ ᓄᐊᕐᑎ, ᑲᑎᒪᔨ

ᓯᑳᑦ ᓄᐊᕐᑎ ᐱᓕᕆᓲᖅ ᐃᖕᒥᒃᑯᑦ ᐱᓕᕆᕕᖕᒥᓂ ᑮᓇᐅᔭᒃᑯᕕᓕᕆᔾᔪᑎᓂᒃ ᖃᐅᔨᒪᓪᓚᕆᒃᑐᖅ ᐊᑯᓂ ᐱᓕᕆᐊᖃᖃᑦᑕᖅᓯᒪᔪᖅ ᐊᑭᑐᔫᑎᓂᒃ ᓂᐅᕐᕈᑎᓕᕆᔾᔪᑎᓂᒃ. ᒫᓐᓇ ᐱᓕᕆᐊᓕᒃ ᐱᕙᓪᓕᐊᑎᑦᓯᓪᓗᓂ ᐱᓕᕆᐊᒃᓴᒨᖓᔪᓂᒃ ᑮᓇᐅᔭᒃᓴᓕᕆᔾᔪᑎᓂᒃ, ᐊᒻᒪᓗ ᐱᓕᕆᔨᐅᒻᒥᔪᖅ ᑲᓇᑕᒥ ᓄᓇᖃᖅᑳᖅᓯᒪᔪᓂᒃ ᐃᑲᔪᖃᑦᑕᖅᑐᖅ ᐱᔪᓐᓇᕈᑎᖏᓐᓂᒃ ᐊᑭᑐᔫᑎᓂᒃ ᓂᐅᕐᕈᑎᓕᕆᔾᔪᑎᓂᒃ ᐱᓕᕆᕕᖁᑎᖏᓐᓄᑦ. ᑕᒪᑐᒪ ᓯᕗᕐᖓᒍᑦ ᐱᓕᕆᕕᖁᑎᒥᓂ ᓇᖕᒥᓂᕐᒥᓂ, ᓯᑳᑦ ᓄᐊᕐᑎ ᐱᒋᐊᕐᖓᓚᐅᖅᓯᒪᔪᖅ ᐅᑯᓇᓂ 2003-2008, ᐱᓕᕆᐊᖃᖃᑦᑕᖅᓱᓂ ᓴᓇᔭᐅᒃᑲᓐᓂᕆᐊᓕᖕᓂᒃ ᐱᓕᕆᕕᖕᓂᒃ ᐊᒻᒪᓗ ᐱᓕᕆᐊᒃᓴᓕᕆᔾᔪᑎᓅᖓᔪᓂᒃ ᑮᓇᐅᔭᓕᕆᔾᔪᑎᓂᒃ ᐱᓕᕆᕕᖁᑎᓕᕆᓂᕐᒨᖓᔪᓂᒃ ᐅᑯᐊ ᑮᓇᐅᔭᕆᔭᓂᒃ ᑮᓇᐅᔭᒃᑯᕕᐊᑦᑕ TD Securities-ᑯᑦ ᒥᐊᓂᖅᓯᒍᑎᓂᒃ. ᓯᑳᑦ ᓄᐊᕐᑎ ᑐᓪᓕᕆᔭᐅᓚᐅᖅᓯᒪᖕᒥᔪᖅ ᐊᖓᔪᖄᒧᑦ ᐊᒻᒪᓗ ᐊᐅᓚᑦᓯᔨᐅᓪᓗᓂ ᐱᖁᑎᖃᕈᑎᓅᖓᔪᑦ ᑮᓇᐅᔭᖃᕈᑎᖏᓐᓂᒃ ᐅᑯᐊ ᑮᓇᐅᔭᒃᑯᕕᖏᑦᑎᒍᑦ CIBC Wood Gundy-ᑯᑦ. ᓯᑳᑦ ᓄᐊᕐᑎ ᐊᖓᔪᖄᖑᖃᑦᑕᔪᒻᒥᔪᖅ ᐊᒻᒪᓗ ᓇᖕᒥᓂᖃᖃᑕᐅᓪᓗᓂ ᐅᑯᓄᖓ Camp Temagami-ᑯᓐᓄᑦ.

ᔮᓐ ᑖᓂᕼᐃ, ᑲᑎᒪᔨ

ᔮᓐ ᑖᓂᕼᐃ ᒫᓐᓇ ᓴᐳᔾᔨᔨᒋᔭᖅ ᐃᑲᔪᖅᑎᐅᓪᓗᓂ ᒪᓕᒐᓕᕆᔾᔪᑎᓅᖓᔪᓂᒃ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᖃᐅᔨᒪᔭᐅᓪᓚᕆᒃᑐᖅ ᖃᐅᔨᒪᓂᖃᓪᓚᕆᒻᒪᑦ ᐅᑭᐅᖅᑕᖅᑐᒥ ᐊᕙᑎᓕᕆᓂᕐᒧᑦ ᕿᒥᕐᕈᔾᔪᑎᓂᒃ ᐊᒻᒪᓗ ᐱᖁᔭᓕᕆᔾᔪᑎᓂᒃ ᒪᓕᒐᖅᑎᒍᑦ. ᑕᐃᒪᖓᓂᒃ ᐱᓕᕆᖃᑦᑕᓕᓚᐅᖅᓯᒪᖕᒪᑦ ᐃᑲᔪᖅᑎᒋᔭᐅᓲᖅ ᒪᓕᒐᕐᓅᖓᔪᓂᒃ ᐃᑲᔪᖅᑕᐅᒋᐊᓕᖕᓂᒃ ᖃᓄᑐᐃᓐᓇᖅ ᐱᔾᔪᑎᓕᖕᓂᒃ ᐅᖅᓱᐊᓗᓕᕆᔾᔪᑎᓅᖓᔪᓂᒃ, ᐅᔭᕋᓐᓂᐊᖅᕕᖕᓂᒃ, ᐊᓯᖏᓐᓂᒡᓗ ᐅᑭᐅᖅᑕᖅᑐᒥ ᐱᕙᓪᓕᐊᑎᑦᓯᔪᓄᑦ ᐊᐅᓚᑕᐅᕙᒃᑐᓂᒃ ᓄᓇᕗᑦᒥ, ᓄᓇᑦᓯᐊᕐᒥᓗ. ᐋᕿᒃᓱᐃᓚᐅᖅᓯᒪᖕᒥᔪᖅ ᒪᓕᒃᑕᐅᑦᓯᐊᕈᓐᓇᖅᑐᓂᒃ ᐊᑑᑎᔪᓐᓇᖅᑕᖏᓐᓂᒃ ᓄᓇᖃᖅᑳᖅᓯᒪᔪᓄᑦ ᒪᓕᒐᓕᕆᔾᔪᑎᓂᒃ ᓄᓇᓕᕆᔾᔪᑎᓂᒃ ᐋᕿᒃᓱᐃᒍᑎᓂᒃ ᐊᒻᒪᓗ ᒫᓐᓇᕐᓂᑕᓂᒃ ᐊᑑᑕᐅᕙᒃᑐᓂᒃ ᓄᓇᖃᖅᑳᖅᓯᒪᔪᓄᑦ ᐊᓪᓚᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᓯᕗᕐᖓᒍᑦ ᐱᓕᕆᐊᕆᖃᑦᑕᖅᓯᒪᔭᖏᑦ ᒪᓕᒐᓕᕆᓂᕐᒨᖓᔪᑦ, ᔮᓐ ᑖᓂᕼᐃ ᐱᓕᕆᐊᖃᖃᑦᑕᖅᓯᒪᔪᖅ ᐊᒥᓱᓂᒃ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ ᐆᒪᔪᓕᕆᔾᔪᑎᓂᒃ ᐊᒻᒪᓗ ᓄᓇᒥᐅᑕᓕᕆᔾᔪᑎᓂᒃ. ᐱᓕᕆᐊᖃᖃᑦᑕᖅᓯᒪᖕᒥᔪᖅ ᑭᒡᓕᑦᓯᓂᐊᖅᑏᑦ ᑲᑐᔾᔨᖃᑎᒌᖏᓐᓄᑦ ᑲᓇᑕᒥᐅᑦ ᐱᓕᕆᕕᖁᑎᖏᓐᓂ ᐊᑐᐃᓐᓇᐅᔪᓂᒃ ᒪᓕᒐᓕᕆᔾᔪᑎᓅᖓᔪᓂᒃ ᐊᒻᒪᓗ ᐃᓕᓴᖅᕕᖅᔪᐊᒥ ᐃᓕᓴᐃᖃᑦᑕᖅᓯᒪᓪᓗ ᐅᕙᓂ ᑭᐅᒍᕆᐅᑉ ᓯᓚᑐᓴᖅᕕᖅᔪᐊᖓᓂ ᐊᕙᑎᓕᕆᔾᔪᑎᓅᖓᔪᓂᒃ.

ᑖᒃᑎ ᕌᓐ ᐅᐊᓚᔅ, ᑲᑎᒪᔨ

ᑖᒃᑎ ᕌᓐ ᐅᐊᓚᔅ ᐱᓕᕆᓕᓂᖅ ᖃᓄᑐᐃᓐᓇᖅ ᐊᕙᑎᓕᕆᓂᕐᒨᖓᔪᓂᒃ ᖃᐅᔨᓴᕈᑎᓂᒃ, ᐅᖅᓱᐊᓗᒃᑕᓕᖕᓂᒃ ᓄᓇᒥ ᓯᐅᖃᒥ ᐊᑑᑎᔪᒃᓴᖅᑕᓕᖕᓂᒃ, ᐅᑭᐅᖅᑕᖅᑐᒥ ᐊᕙᑎᓕᕆᔾᔪᑎᓅᖓᔪᓂᒃ ᐊᒻᒪᓗ ᓴᓇᒋᐅᖅᓴᐅᑎᒃᓴᓂᒃ ᐃᓕᓴᕈᑎᒃᓴᓂᒃ. ᐊᐅᓚᑦᓯᖃᑦᑕᖅᓯᒪᖕᒥᔪᖅ ᐊᖏᔫᑎᓂᒃ ᐱᓕᕆᐊᒃᓴᓂᒃ, ᒪᑯᐊ ᐃᓚᒋᔭᐅᓪᓗᑎᒃ ᓄᓇᖓᓂ ᐃᐅᓪᐸᑕᒥ ᐆᑕᕐᓇᖅᑐᖅᑕᓕᖕᓂᒃ ᖃᐅᔨᓴᕐᓂᕐᒥᒃ ᐊᒻᒪᓗ ᐃᐅᓪᐹᑕ ᐅᐊᖕᓇᖓᑕ ᑕᓕᖅᐱᐊᓂ ᐃᓱᐊᖅᓴᐃᔾᔪᑎᑦ ᖃᐅᔨᓴᖅᑕᐅᑎᓪᓗᒋᑦ ᕿᒥᕐᕈᒍᑎᓂᒃ. ᐅᓇ ᑖᒃᑎ ᐅᐊᓚᔅ ᐊᒥᓱᐊᓗᖕᓂᒃ ᐱᓕᕆᐊᖃᖃᑦᑕᖅᓯᒪᔪᖅ ᓇᒥᑐᐃᓐᓇᖅ ᑲᓇᑕᒥ ᐊᒻᒪᓗ ᓄᓇᖓᓐᓂ ᐅᓛᓴᒃᑯᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐃᓕᓐᓂᐊᑎᑦᓯᖃᑦᑕᖅᓯᒪᓪᓗᓂ ᐊᒻᒪᓗ ᐊᓪᓚᖃᑦᑕᖅᓯᒪᓪᓗᓂ ᐊᒥᓱᐊᓗᖕᓂᒃ ᐱᔾᔪᑎᓕᖕᓂᒃ ᐅᑭᐅᖅᑕᖅᑐᒥᒃ ᐊᒻᒪᓗ ᐊᕙᑎᓕᕆᔾᔪᑎᓅᖓᔪᓂᒃ ᖃᐅᔨᓴᕈᑎᓂᒃ ᑭᒡᓕᑦᓯᓂᐊᕈᑎᓂᒃ. ᓈᒻᒪᒃᑐᓂᒃ ᐱᔭᕇᑦᓯᐊᖅᓯᒪᖕᒥᔪᖅ ᐱᔭᕆᐊᑐᔪᐊᓗᖕᓂᒃ ᐊᑲᐅᓈᖅᑕᐃᓯᒪᓪᓗᓂ ᐊᖏᖃᑎᒌᒍᑎᖏᓐᓂᒃ ᐅᑭᐅᖅᑕᖅᑐᒥᐅᑦ ᐊᒻᒪᓗ Alberta-ᒥᐅᑦ, B.C-ᒥᐅᑦ, ᓄᓇᑦᓯᐊᕐᒥᐅᓪᓗ. 1997-ᒥ, ᑎᒃᑯᐊᖅᑕᐅᓚᐅᖅᓯᒪᔪᖅ ᐃᓱᒪᑕᖅᑖᖑᓪᓗᓂ ᑐᑭᒧᐊᒃᑎᑦᓯᔨᐅᓂᕐᒧᑦ ᑐᕌᑦᑐᓂᒃ ᑭᒃᑯᑐᐃᓐᓇᕐᓄᑦ ᑕᐅᖅᓰᒍᑎᖏᓐᓂᒃ ᑲᓇᑕᒥᐅᑦ ᓴᐳᔾᔨᒍᑎᓂᒃ ᓴᓇᕕᐅᕙᒃᑐᑦ ᑕᒫᓂ ᐊᒻᒪᓗ ᑖᒃᑯᓂᖓ ᓄᖃᐅᔾᔨᔪᔪᖅ ᐱᓕᕆᐊᒥᓂᒃ 2006-ᒥ ᑭᖑᕐᖓᒍᑦ ᐊᑐᐃᓐᓇᕈᒻᒪᑕ ᑭᖒᒪᔭᑦ ᐱᓕᕆᕖᑦ ᐃᓂᖏᑦ Calgary-ᒥ, Delaware-ᒥ, Florida-ᒥᓗ. ᑖᒃᑎ ᐅᐊᓚᔅ ᓯᕗᓪᓕᖅᐹᒥ ᓴᖀᖄᓚᐅᖅᓯᒪᔪᖅ ᓈᒻᒪᓈᑦᓯᐊᖅᓯᒪᔪᒥᒃ Calgary-ᒦᑦᑐᒥᒃ ᓴᓇᐅᒐᕐᓂᒃ ᑕᑯᔭᒐᖃᕝᕕᖕᒥᒃ ᐅᕙᓂ 1985-ᒥ, ᐆᒥᖓ Wallace Galleries ᑕᑯᔭᒐᖃᕝᕕᒃ, ᓴᕿᐅᒪᕕᐅᓲᖅ ᐅᐊᓕᓂᐊᓂ ᑲᓇᑕᒥ ᑕᑯᔭᒐᖃᖅᕕᒃ ᓴᓇᐅᒐᕐᓂᒃ.

ᑲᑎᒪᔨᖅᔪᐊᖅ ᐲᑕ ᓛᕼᐄᑦ, ᓯᕗᒧᐊᒃᓯᒪᔪᖅ ᖁᑦᓯᖕᓂᓕᖕᒥᒃ ᒪᓕᒐᓕᕆᔾᔪᑎᓅᖓᔪᓂᒃ ᐅᖃᐅᔾᔨᒋᐊᖅᑎ

ᓯᕗᕐᖓᒍᑦ ᐱᓕᕆᔨᐅᓪᓚᕆᓚᐅᕋᓂ ᐱᓕᕆᐊᕆᑦᓯᐊᖏᓐᓇᓚᐅᖅᑕᒥᓄᑦ ᐱᖁᔭᓕᕆᔾᔪᑎᓅᖓᔪᓄᑦ ᒐᕙᒪᒃᑯᓐᓄᑦ, ᑖᓐᓇ ᐲᑕ ᓛᕼᐄᑦ, 1962-ᒥ, ᒐᕙᒪᒃᑯᓐᓄᑦ ᒪᓕᒐᓕᕆᔾᔪᑎᓅᖓᔪᓄᑦ ᐃᑲᔪᖅᑎᕈᔪᒻᒪᑦ, ᑐᓪᓕᕆᔭᐅᓪᓗᓂ ᐊᖓᔪᖄᒧᑦ, ᓂᕈᐊᖅᑕᐅᓚᐅᖅᓯᒪᓪᓗᓂᓗ ᑲᑎᒪᔨᖏᓐᓄᑦ ᐅᑯᐊ Mannix-ᑯᑦ ᑲᒻᐸᓂᓄᑦ. ᐅᕙᓂ 1965-ᒥ, ᐊᕐᕌᒍᖃᓕᖅᓱᓂ 36-ᓂᒃ, ᓂᕈᐊᖅᑕᐅᓚᐅᖅᓯᒪᔪᖅ ᓯᕗᓕᖅᑎᕈᖅᓱᓂ ᐱᖁᔭᓕᕆᕕᖕᒥ PCP-ᑯᓐᓄᑦ Alberta-ᒥ. ᐅᕙᓂ 1971-ᒥ, ᓯᕗᓕᖅᑎᕈᓚᐅᖅᓯᒪᔪᖅ Alberta-ᒥ, ᑕᒡᕙᓃᓚᐅᖅᓯᒪᔪᖅ ᐃᓂᒥᓂ ᐅᖓᑖᓄᑦ ᐱᙵᓱᑦ ᓂᕈᐊᕐᓇᐅᓕᕋᐃᒻᒪᑦ. ᐲᑕ ᓚᕼᐄᑦ ᐱᓕᕆᐊᒥᓂᒃ ᓄᖃᐅᔾᔨᓚᐅᖅᓯᒪᔪᖅ ᐱᖁᔭᓕᕆᔾᔪᑎᓅᖓᔪᓂᒃ 1985-ᖑᑎᓪᓗᒍ ᐊᒻᒪᓗ ᑭᖑᕐᖓᒍᑦ ᑕᒪᑐᒪ ᐱᓕᕆᔨᐅᓕᔪᔪᖅ ᖁᑦᓯᓂᖅᓴᒨᖓᔪᑎᒍᑦ ᐃᓚᒋᔭᐅᔾᔪᑎᖃᓕᖅᓱᓂ Bennett Jones-ᑯᑦ ᐱᖁᔭᖅᑎᒍᑦ ᒪᓕᒐᓕᕆᔨᓄᑦ Calgary-ᒥ. ᑲᑎᒪᔨᐅᖃᑦᑕᖅᓯᒪᓕᖅᑐᖅ ᐅᖓᑖᓄᑦ ᐊᕐᕌᒍᐃᑦ 15 ᐊᖏᔫᑎᓄᑦ ᑲᓇᑕᒥ ᑲᒻᐸᓂᓄᑦ ᐊᒻᒪᓗ ᐊᑑᑎᕙᒃᓱᓂ ᐅᖃᐅᔾᔨᒋᐊᖅᑎᐅᓪᓗᓂ ᖃᓄᑐᐃᓐᓇᖅ ᐊᒥᓱᓄᑦ ᐊᓯᖏᓐᓄᑦ ᑲᓇᑕᒥ ᑎᒥᐅᔪᓄᑦ. ᐃᓚᐅᖃᑦᑕᖅᓯᒪᖕᒥᔪᖅ ᐊᒥᓱᓄᑦ ᐊᔾᔨᒌᖏᑦᑑᑎᓄᑦ ᖃᓄᑐᐃᓐᓇᖅ ᑎᑭᐅᑎᓯᒪᓕᖅᑐᑦ ᒫᓐᓇᒧᓄᑦ. ᐃᓚᐅᖕᒥᔪᖅ ᐃᓕᑕᕆᔭᐅᔾᔪᑎᓕᕆᔨᓄᑦ ᑲᓇᑕᒥ, ᒐᕙᒪᒃᑯᓪᓗ ᑲᑎᒪᔨᖅᔪᐊᖏᓐᓄᑦ ᐊᒻᒪᓗ ᑐᓂᓯᕕᐅᖃᑦᑕᖅᓯᒪᓪᓗᓂ ᐃᓕᓴᐃᔨᓪᓚᕆᐅᓂᖓᓄᑦ ᖃᐅᔨᒪᔭᐅᓕᕐᒪᑦ ᐊᒥᓱᓂᒃ ᐱᔪᓂᒃ ᑲᓇᑕᒥ ᐃᓕᓴᖅᕕᖅᔪᐊᓂᒃ.

ᐅᖃᐅᔾᔨᒋᐊᖅᑎ ᑲᑎᒪᔨᕋᓛᓄᑦ

ᐋᕿᓱᖅᑕᐅᑎᓪᓗᒋᑦ ᐅᑯᐊ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐ ᑲᑎᒪᔨᖏᑦ, ᐃᓚᐅᑎᓪᓗᒋᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑑᑕᐅᖁᔭᐅᓚᐅᖅᓯᒪᖕᒪᑕ ᐱᖁᔨᕗᖔᑎᒍᑦ ᐱᑕᖃᓪᓗᓂ ᑲᑎᒪᔨᕋᓛᓂᒃ ᐅᖃᐅᔾᔨᒋᐊᖅᑎᐅᓗᑎᒃ ᑲᑎᒪᔨᕋᓛᑦ ᐋᕿᒃᓯᒪᓂᐊᕐᒪᑕ ᐃᓚᖃᓪᓗᑎᒃ ᑭᒡᒐᖅᑐᖅᑐᓂᒃ ᐃᓚᐅᑎᓪᓗᒋᑦ ᐱᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ. ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᑦ ᐱᓕᕆᐊᖃᖃᑦᑕᖅᑐᑦ ᐊᑐᐃᓐᓇᐅᕕᖃᖅᓱᑎᒃ ᐅᖃᐅᔾᔨᒋᐊᖅᑎᐅᓪᓗᑎᒃ ᐅᑯᓄᖓ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᒃᑯᓐᓄᑦ ᐃᑲᔪᖅᑎᒋᓂᐊᕐᒪᒋᑦ ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᒃᑯᑦ ᐱᐅᓯᖃᑦᑎᓪᓗᒋᑦ ᐊᑑᑎᔪᓐᓇᖅᑐᓂᒃ ᐃᓚᐅᔪᒪᔪᓂᒃ, ᐃᓚᐅᔪᒪᑦᓯᐊᖅᑐᓂᒃ ᐊᒻᒪᓗ ᐊᑑᑎᓂᖃᑦᓯᐊᕐᓂᐊᕐᒪᑕ ᐃᓄᖕᓄᑦ ᓄᓇᑖᖃᑕᐅᓯᒪᔪᓄᑦ ᓄᓇᕗᑦ ᓄᓇᖓᓂ. ᓄᓇᕗᑦᒥ ᐊᑐᐃᓐᓇᕐᓂᒃ ᑯᐊᐳᕇᓴᓐ ᐅᖃᐅᔾᔨᒋᐊᖅᑎᖏᑦ ᑲᑎᒪᔨᕋᓛᑦ ᑲᑎᒪᔨᓖᑦ ᑭᒡᒐᖅᑐᖅᑐᓂᒃ ᐅᑯᓇᖓᑦ ᐱᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ:

  • ᓄᓇᕗᑦ ᑐᙵᕕᒃ
  • ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ
  • ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ